၂၀၂၀ တရုတ်နှစ်သစ်ကူးပွဲတော်(ရန်ကုန်) ကို ပျော်ပွဲရွှင်ပွဲတွေ၊ ဖျော်ဖြေရေးအစီအစဉ်တွေနဲ့ ကျင်းပသွားမည်

ရန်ကုန်တိုင်းဒေသကြီးအစိုးရအဖွဲ့ ခွင့်ပြုချက်အရ ဖူကျန့် တရုတ်အမျိုးသားများအသင်းမှဦးဆောင်၍ ၂၀၂၀ ခုနှစ် တရုတ်နှစ်သစ်ကူးပွဲတော် (ရန်ကုန်)ကို ဇန်နဝါရီလ (၂၅) ရက်နေ့မှာ ရန်ကုန်မြို့၊ လသာမြို့နယ် တရုတ်တန်းမှာ ရိုးရာဖျော်ဖြေရေးအစီအစဉ်များ၊ ပျော်ပွဲရွှင်ပွဲများနှင့် Live show အစီအစဉ်များဖြင့် စည်ကားသိုက်မြိုက်စွာ ကျင်းပသွားမည်ဖြစ်ပါသည်။

လသာမြို့နယ် (တရုတ်တန်း)မှာ နှစ်သစ်ကူး အလှဆင်မီးပန်းများ၊ Photobooth များထားရှိသွားမည်ဖြစ်ပြီး ဇန်နဝါရီလ (၂၅) ရက်နှင့် (၂၆) ရက်နေ့များမှာလည်း နာမည်ကျော်စားသောက်ဆိုင်များပါဝင်သည့် မုန့်ဈေးတန်း ထားရှိသွားမည်ဖြစ်ကြောင်း သိရပါသည်။

ဒီနှစ်၏ထူးခြားချက်ကတော့ ညနေခင်းပိုင်းမှာ နာမည်ကျော်အဆိုတော် (၇) ဦး၏ Live Show အစီအစဉ်နဲ့အတူ ပွဲလာရောက်သူများအနေနဲ့ တရုတ်နှစ်သစ်ကူးပွဲတော်ကို လာရောက်လည်ပတ်ရင်း စားသုံးနိုင်ဖို့ မုန့်ဈေးတန်း၊ စတုဒီသာမဏ္ဍပ်များလည်း ပါဝင်သွားမည်ဖြစ်ကြောင်း တာဝန်ရှိသူများထံမှသိရသည်။

ဒါ့အပြင် မုန့်ဈေးတန်းမှာ လည်ပတ်ရင်း အပျော်တမ်းဂိမ်းတွေကစားပြီး မုန့်တွေ၊ လက်ဆောင်တွေရရှိနိုင်မယ့် အထူးအစီအစဉ်တွေလည်း စီစဉ်ထားကြောင်းသိရသည်။